ஜமீல் கவிதைகள்

மழையை வீட்டுக்கு

அழைத்து வந்த சிறுவன்

____________________________

விளையாடச் சென்ற சிறுவன்

திரும்பி வரும் போது

எதையாவது அழைத்து வருவான்

இன்றும் அவ்வாறு

வகுப்பு நண்பனைப்போல் மழையை

வீட்டுக்கு அழைத்து வந்திருந்தான்

வளமைபோல் பட்டாம் பூச்சி

அல்லது பூனைக் குட்டியோடு

வந்திருந்தால் சமாளித்திருக்கலாம்

வெளியில் மழையை

விட்டு வரச் சொன்னால்

அவனும் கூடச் செல்ல

எப்படியும் புறப்படுவான்

மழையை அமர வைக்க

வீட்டில் தோதான இடமில்லை

உடன் ஒரு பாத்திரத்தில்

உட்காரச் செல்கிறேன்

இறங்கி வர அடம் பிடித்து

சிறுவனின் புயங்களில்

சொட்டுச் சொட்டாக

வடிந்து கொண்டிருந்தது மழை

மாரி காலங்களில்

தனியே செல்லும் சிறுவர்கள்

மழையின் விரல் பற்றியபடிதான்

அனேகமாக வீடு திரும்புகின்றனர்

●

உதவாச் சொற்கள்

______________________

பாடலொன்றை எழுதுகையில்

சில உதவாத சொற்கள்

அவ்வப்போது உறுத்தின

தேவையற்ற அச் சொற்களை

இடைக்கிடை நீக்கி விடுகிறேன்

கைபிடியளவு சொற்கள்

ஈற்றில் சேகரமாகின

எஞ்சிய சொற்களை

என்ன செய்வதென்று புரியவில்லை

இனி எதற்கும் உதவாதென்று

அதனை குப்பை கூடைக்குள்

உடன் வீசி விடுகிறேன்

இப்போது கூடைககுள்ளிருந்து

ஒலிக்கத் துவங்கியது

ஒரு இனிமையான பாடல்

●

கைபிடியளவு அன்பு

__________________________

கைபிடியளவு அன்புதான்

என் வசம் இருக்கிறது

எத்தனை இதயங்களுக்கு

அதனை கிள்ளிக் கொடுப்பதென்று

எனக்குப் புரியவில்லை

அன்பை அள்ளிச் சொரியாமல்

இவ் வாழ்வை வாழ்வதில்

அர்த்தங்கள் எதுவுமில்லை

ஆதி தொட்டு மிக ஐக்கியமாக

என்னோடு பயணித்தவர்கள்

இடை நடுவில் வந்து

சேர்ந்து கொண்டவர்களென

ஒவ்வொருத்தருக்குமாக அன்பு காட்டி

ஆத்மாவை ஆற்றுப் படுத்துறேன்

சில சமயங்களில் அளவற்ற அன்பை

எப்படி வழங்குவதென்ற

கடும் குழப்பங்களிடை

பைத்தியம் பிடிப்பதுமுண்டு

இருந்தும் காலத்தின் கோடுகளில்

அன்பை குழைத்து தீட்டாது

நமது அற்ப ஆயூளை

எங்கணம் வரைந்து தீர்த்தல் தகும்

இத்தனைக்கும் என்னை நான்

இன்னும் நேசிக்கத் துவங்கவில்லை

இயற் பெயர் அப்துல் ஜமீல்

கிழக்கிலங்கையின் அம்பாரை மாவட்டத்திற்குட்பட்ட கல்முனை பிரதேச சபையின் நிர்வாகத்தின் கீழ் இருக்கும் மருதமுனை கிராமத்தை பிறப்பிடமாகவும் வசிப்பிடமாகவும் கொண்ட இவர் ஜமீல் என்ற பெயரில் 90 களிலிருந்து கவிதைகள் சிறுகதைகளென எழுதி வருகிறார்.

இதுவரை 11 கவிதைப் பிரதிகளை வெளியிட்டுள்ள இவர் கவிதைக்கான உயரிய விருதுகளான இலங்கை அரசின் சாஹித்ய மண்டல விருது கிழக்கு மாகாண சாஹித்ய விருது கொடகே சாஹித்ய மண்டல விருது அத்தோடு வைரமுத்து அறக்கட்டளையால் வருடம் தோறும் வழங்கப்பட்டு வரும் கவிஞர்கள் திருநாள் விருதையும் 2017 ம் ஆண்டு பெற்றுள்ளார்

இவரது படைப்புகளை பல்களைக் கழக மாணவர்கள் தங்களது விசேட கற்கைக்காக ஆய்வுக்குட்படுத்தி பட்டப் படிப்புகளை பூர்த்தியும் செய்துள்ளார்கள் என்பதும் இங்கு சுட்டிக் காட்ட வேண்டிய விசேட அம்சமாகும்

அத்துடன் சிங்களம், ஆங்கிலம், மலையாளம், ஹிந்தி ஆகிய பிற மொழிகளிலும் இவரது கவிதைகள் மொழிமாற்று செய்யப்பட்டுள்ளன என்பதும் இங்கு குறிப்பிடத்தக்கது.