ஒரு குருவிகள்
——————————–
கிணற்று விளிம்பில்
ஒரு குருவி
நீரின் மிசை
ஒரு குருவி
ஒரு குருவிகள்
ஆச்சர்யத்தோடு
பார்த்துக் கொண்டன
ஒரு குருவிகள்
ஆதுரமாக
முத்தமிட்டுக் கொண்டன
ஒரு குருவிகள்
இசைத்துக் கண்டன
ஒரு குருவிகள்
கதைத்துக் கொண்டன
கடைசியில்
பிரிய மனமில்லாத
ஒரு குருவிகள்
சேர்ந்தே
சிறகடித்தன
நாளைய கனவு
———————————–
ஸ்பைரோகைரோ சிதற
ரானாஹெக்ஸாடாக்டைலாவாக
குதித்துக் கொண்டிருந்தேன்
நேற்று
இன்றோ
மாஞ்சிஃபெரா இண்டிகாவில்
கொலம்பா லிவியாவாக
சிறகு கோதிக் கொண்டிருக்கிறேன்
ஹைபிஸ்கஸ் ரோசா சைனன்சிஸாக
உங்கள் போர்டிகோவின் முன்
மலர வேண்டும்
என்பது
நாளைய கனவு.
Mr. கன்னுக்குட்டி
————————————-
கண்ணதாசனைத் தவிர
வேறு யாரும்
கவிஞன் அல்லன்
என உறுதி மொழிகிற
நண்பருண்டு
எனக்கு
மணி 7:01pmக்கெல்லாம்
அவர் கரங்கள்
நடுங்கத்துவங்கிவிடும்
உலகின்
உயர்ந்த ‘குடி’
எனது ‘குடி’
என்பவர்
Diamond
Black pearl பானங்களை
ஒதுக்கி
Bacardi lemon தான்
அருந்துவார்
புலி அருந்தினாலும்
ரூ135ஐ அருந்துவதில்லை
அவர் கதையில்
மிடறுகளை
உள்ளிழுக்கும் போது
பதார்த்தங்கள்
இருக்கிறதோ
இல்லையோ
இளையராஜா
பாடல்கள் அவசியம்
குறிப்பாக
அம்மா பாடல்கள்
காதல் சோக கீதங்கள்
தாரை தாரையாக
கண்ணீர் மல்க
சேர்ந்திசைப்பார்
காற்றில்
வயலின்கள்
மீட்டுவார்
போதை
தலைக்கேறிய
கணத்தில்
மணமாகி
இரு குழந்தைகளுக்கு
தாயான
அவரது “புஜ்ஜிமா” வின்
இல்லாத அலைபேசி எண்ணை
இருப்பது போல்
துழாவுவார்
“இப்படி குடித்தால்
ஈரல் கெட்டு விடும்”
என்றால்
மறுமொழியாக
” இப்படி குடிக்காவிட்டால்
இருதயம் கெட்டு விடும் “
என்பவரின்
இஷ்ட கானம்
“தண்ணித்தொட்டி தேடி வந்த
கன்னுக்குட்டி நான்… “
என்பது
குறிப்பிடத்தக்கது
புரோட்டாவின் காதல்
——————————————
சாதா புரோட்டா
ஒரு மதியத்தில்
பிரியாணியை
காதலிப்பதாக
சால்னாவிடம்
தெரிவித்தது
ரகசியத்தை மறைக்கத்தெரியாத
சால்னா
தோசைக்கல்லிடம் சொல்ல
தோசைக்கல் கரண்டியிடம்
பகிர்ந்து கொள்ள
அன்றைய அந்தியில்
சாதா புரோட்டா
கொத்துபுரோட்டாவானது
ஸ்ரீதர் பாரதி
கவிதை சிறுகதை என தொடர்ச்சியாக இயங்கி வருபவர். மதுரையில் வசித்து வருகிறார்.
இதுவரை வெளிவந்த கவிதை நூல்கள்
1.செவ்வந்திகளை அன்பளிப்பவன்
2.கருப்பு வெள்ளை கல்வெட்டு
3.முத்தம் சரணம் கச்சாமி
4.அப்பாவின் குதிரை
சிறுகதைத்தொகுப்பு “ஜெயக்கொடி”
