மனக்குழப்ப மனிதர்கள்.
கண நேர
மௌனம்
நினைக்க வைத்துவிடுகிறது
எல்லாவகையான
எதிர் மறை
சிந்தனைகளையும்
ஒரு முறையாவது
நினைத்திருக்கலாம்
அவருக்கும்
வேலைகள்
இருக்குமென.
******
நாய் வளர்க்கும்,
மனிதர்கள்.
வீதியில் செல்லும்
நாயும் மனிதரும்
பற்றியிருப்பது
யாரென
அறிய தோன்றும்.
எப்பொழுதாவது
நழுவிய
பிடிக்கயிறு
சொல்லிவிடுகிறது
துரத்தி ஓடும்
மனிதர்களை
பார்க்கச்சொல்லி.
****
சொல்வதற்கு ஒன்றுமில்லை.
இந்த
மௌனம் சொல்கிறதொரு
செய்தியை
அவரவர்கள்
மொழி பெயர்க்கிறார்கள்
அவரவர்களின்
செய்தியாக.
++
அவராகவே வாழ்ந்தார். எவருக்கும் பிடிக்காதபடி.
பொய்ய சொல்லவில்லை.
புறம் பேசவில்லை.
வெறுப்பு வார்த்தையில்லை.
வேதனைப்பட வைத்ததில்லை.
சிரித்தும் மகிழவில்லை.
சிந்தனை தூண்டும்படி பேசவுமில்லை.
போட்டியாக இருக்கவில்லை.
போட்டி போட்டும் இருந்ததில்லை.
பொறுமையாகவே வாழ்ந்தார்.
போதுமென இருந்தார்.
,
பொசுக்கென
இறந்தவரைப்பற்றி
வெள்ளையாக
உடுத்தி
வேதனை கொள்ள வைத்தவர்கள்
நல்லவனாக
இருந்தென்ன லாபமென
சொன்னார்கள்
நல்லவராக
இருப்பதன்
சிரமம்
அறியாமல்.
***
என்ன செய்யலாம்.
பிச்சையெடுப்பது
தொழிலாக இருக்கலாம்.
கை குழந்தையைக்காட்டி
காசு கேட்பதொரு
யுக்தியாகவும்
இருக்கலாம்.
காசைப் போட்டுவிட்டு
நகராமல்
குழந்தையைப் பார்த்தது
மாபெறும்
தவறாகிவிட்டது.
ஏறியமர்ந்த
குழந்தை
இறங்க மறுக்கிறது
வெகு தூரம்
வந்த பிறகும்.
***
கட்டில் ஆசை.
அந்நியமாகிப்
போனது
கடைகளாக
மாறிப்போன
தெருவை
பார்க்கும்பொழுது
வீடுகளை விடாத
சில
பூர்வகுடிகளுக்கு.
,
வாகனங்கள்
நின்றபாடில்லை.
பின்னிரவு வரை
வியாபார நிமித்த
வேலைகளின் பொருட்டால்
இரைச்சலென
எப்பொழுதும்.
,
நினைவுக்குள்
சிக்கிக் கிடக்கிறது.
நிறைவேறாத
ஆசையாக.
பழைய தெருவாக
பார்க்கும் ஆவல்
மேவி
பலருக்கும்.
,
தேடும்படியாக
ஒளிந்து கிடக்கிறார்கள்.
பேப்பர்க் கடை
பன்னீர்.
மருந்து கடை
சலீம்.
பழ வண்டி
சின்னான்.
வெத்தலைக்கடை பாய்.
(பெயர் அநேகமாக யாருக்கும் தெரியாது.)
மல்டி ஸ்பெஷாலிட்டி
இல்லாத
ரத்தினம் டாக்டரும்.
கால மாறுதல்கள்
கடந்தும் வாழ்ந்து.
,
மரணம்
நிகழலாம்
மறுவினாடி கூட
தனிமையில்.
மாறிடாத பழைய
ஓட்டு வீட்டில்
கால் வெட்டி
கட்டிலில்
கிடக்கும்
இனிப்பு நீர்க்காரர்
மாத்திரைகள்
எடுக்க
மறந்துபோனால்.
,
காலத்தின்
கருணையில்
கடைகளற்ற
பழைய தெருவாக
மாறினால்.
அன்னக்கிளி
அப்பொழுதாவது
பதில் கடிதம்
கொடுத்தால்
தாளி அறுத்து
தண்டமாக
முதிர்ந்து
உதிராமல் போகலாம்.
இனிப்பு நீர்க்காரரோடு
இன்பமாக வாழ்ந்து.
***
