வெள்ளிப் பனிமலை
உறைந்த பனிமலை
சூரியனிடம் காதல்
கொண்டது
,
ஆயிரம் கரங்கள்
தழுவியது
அன்பினால்
உருகி உருகி
நதியை பெற்றெடுத்தது
,
நதி வளரத் தொடங்கியது
அருவியாக நீரை கொட்டி விளையாடியது
,
நதியின் ஆழம் பெறுக
மலை இரண்டாக
பிளந்து கொண்டது
,
நதி உயர்ந்தவுடன்
கடலுடன் கலந்தது
,
மலைக்கு வேறு வழியில்லை
கடலில் மூழ்கியது
நினைவிலிருந்து
காணாமல் போனது
,
சூரியன் தேடிப் பார்த்து விட்டு
அடுத்த
அழகான உயர்ந்த
நீலப் பனிமலையிடம்
தஞ்சம் புகுந்தது
++
நகரத்திற்கு எதிராகக் கடற்கரை
கடற்கரையில்
கால்களின் முகம்
நகங்கள்
நனைக்க
ஊருக்கு வெளியே
செல்ல வேண்டியுள்ளது
மொத்தக் கடற்கரையும்
ஊரை ஒட்டித்தான் உள்ளது.
,
கடற்கரையின் முகம்
தெரிந்த இடத்தில்
இருந்து தான்
பேரமைதி தொடங்கும்
,
நாம் தேடிச் சென்றாலும்
வரவேற்பது என்னவோ
பெருங்கடல்
இரு கைகளையும்
அகல விரித்தவாறு
இதயத்தில்
பெருங்குரலெடுத்து
வரவேற்கும்
அலைகளைக் கண்ட
உடைகள் வெட்கப்பட்டு
சுருண்டு கொண்டன
அலைகளைத் தொட்டவுடன் நுரைகள் பெருகுகின்றன
,
வானத்தில்
பறவைக் கூட்டங்கள்
ஒன்றுடன் ஒன்று
இடமாற்றி ஏதோ ஒரு வடிவத்தில் பறப்பது போன்று
அலை நுரைகள்
ததும்பி
நிலத்தை தொடாமல்
பறக்கின்றன
,
கரை நிழல்
ஈரம் கொண்டது
கரைகளில் நிற்க முடியாமலும்
கடலில் சென்று
கலக்க முடியாமலும்
,
வீழ்ந்தும் உயர்ந்தும்
தவிக்கிறது
ஆடிக் கொண்டு
இருக்கும்
மர ஊஞ்சல்
,
பனி படர்ந்த
பொடியில்
நீரில் மூழ்காமல்
நடந்து செல்வது
ஆம்பல் மலர் இதழ்கள்
பாதங்களை ஏந்துவது போன்று
மணல் பஞ்சு மெத்தை ஏந்துகிறது
நம் எடையைச் சிறிது
சிறிதாகப் புதைந்து
சுவடுகளை வரைந்து கொண்டே வருகிறது.
,
அன்பு கொண்ட
உள்ளம் மனதை
வருடுவது போல்
அலைகள் கொண்ட
நுரைகள்
எல்லாவற்றையும்
நனைத்து விடுகின்றன
ஊருக்குள்
பறந்து செல்ல
பொன் மணல் துகள்கள்
பெருங்காற்றுக்கு
காத்துக் கொண்டு
இருக்கிறது
++
மழையில் நனைதல்
மழை பெய்தால்
எல்லோரும் செய்வது
நனையாமல் இருப்பது
குடை பிடிப்பது
கூரையின் கீழ் நிர்ப்பது
பெண்களை வேடிக்கை பார்ப்பது போல் பார்த்தல்.
எங்கோ ஓடுவது
பதற்றம் கொள்வது
வேண்டி கொள்வது
மழையில் நனைதல்
யாருக்கு வாய்த்ததோ
,
தொடர் விளக்கு
தொடர் விளக்கு
தொடர் வண்டி போல்
தொடர் விளக்குகள்
,
திருவிழாவை அறிவிக்கிறது
அழைக்கிறது
கவனத்தை பெறுகிறது
,
அகல் விளக்கை ஏற்றியவுடன்
அந்தரத்தில்
ஒவ்வொரு விளக்காக
பறந்து
,
ஒன்றுடன் ஒன்று ஒட்டி கொண்டு
ஒளிகள் பல சேர்ந்து
அணியாக
,
வானத்தின் கீழே
மாளிகைகள் மேலே
பட்டு ஒளி வீசியது
,
பறக்கும் இதழ்கள்
மல்லிகை கொடியில்
மொட்டுகள்
மலர்ந்த நொடியில்
பிரிந்தது
அருகே நின்ற
உருளியில் விழுந்தது
விழுந்த நொடியில்
இதழ்கள் பிரிந்து
பறந்து
செல்ல காத்திருந்தது
அந்த வழியில்
வந்த தென்றல்
எட்டி பார்த்தது
இதழ்கள்
பிடித்து கொண்டு
பறந்தது
++
சோழன்
சொந்த ஊர் தஞ்சாவூர். இவர் தஞ்சாவூரில் பள்ளியில் கணிப்பொறி அறிவியல் துறையில் பணிபுரிந்து வருகிறார். சொல்வனம், மயிர் மற்றும் காற்றுவெளி இணைய இதழ்களில் கவிதைகள் வெளிவந்துள்ளன. மயிர் மற்றும் சிறுகதைகள்.காம் இணைய இதழ்களில் சிறுகதைகள் வெளிவந்துள்ளன.
