டிஜிட்டல் உலகு
டிஜிட்டல் உலகு முறிவுகளை அதிகரித்தபடி
விரைகிறது
–
காதலை
அன்பை
உறவுகளை
நேர்மையை
–
மனதையென
அதன் பட்டியலில்
இல்லாதது ஏதுமில்லை
–
டிஜிட்டல் ஏனிந்த வெட்டி முறிப்பை
இவ்வளவு சிரத்தையாகச் செய்து வருகிறது
காரணத்தின் கரு டிஜிட்டலியே இருப்பதை
ஓர் எலும்பு முறிவுப்
பரிசோதனையைப் போலத் தெரிந்து கொள்ள முடியும்
–
எல்லா டிஜிட்டல் எண்ணும் எலும்பு முறிவுகளைக் கொண்டுள்ளது.
முறிவுகள் இல்லாமல் ஓர் எண்ணும் டிஜிட்டலில் இல்லை
இப்படியான டிஜிட்டல் உலகில் முறிவுகள்
இயல்பாகிவிடுவதை
ஏற்க மறுத்து
காத்திருப்பவர்களின் காலடியில்
உறிஞ்சிப் போட்ட எலும்புத் துண்டுகள்
குவித்து கொண்டேயிருக்கின்றன.
++
தசாமி
தாரபுரத்தைச் சார்ந்த செல்வப்பிரகாஷ்
தசாமி என்ற பெயரில் எழுதி வருகிறார்.
சிற்றிதழ், அச்சு இதழ்களில் கவிதைகள் வெளியாகி உள்ளது.
உடலெங்கும் வெய்யில் எனும் கவிதைத் தொகுப்பு வெளியாகியுள்ளது.